網紅的藏寶箱我6歲學游水，7歲開始比賽，一直到15歲。
果陣時，冬天4度都照游，完全唔知咩叫凍。比賽中，我主力游蛙式，好多人都以為游蛙式好容易，但練落就知煩。
教練話我嘅泳姿太醜，事關我一跳落水就猛撥，於是佢限制我：「跳水之後起計，游完直池，只准蛙最多6下。」我同佢講「無可能㗎喎」，佢就叫我自己諗辦法。
助教見我好忟，就指我去練手力、腳力、同埋練姿勢，話只要三樣都啱，就會做到蛙6下游完直池，助教仲話，因為我生得矮，所以有6下嘅優待，佢哋要練到4下之內。
我心諗，優待？6下點游？
但忟還忟，我有一鼓唔憤氣嘅心，既然人哋做到，我都一樣可以，只要我勤力練。
故事發展到呢度，最後我當然做得到，不過仍然被嫌棄頭上水時上得太高，話咁會阻水。
最近游返水，hea住蛙手蛙腳，好彩都去水又唔會太慢，游游下我就醒起當年忟到想喊嘅自己，然後先至感覺到：一個人用最少力游到最遠，唔代表佢好醒目，其實背後嘅基本功，真係無人會知道。
IG @ echow03
Search